Mikilvægt er að senda almenningi í ríkjum Evrópusambandsins skýr skilaboð um það að meira tjón felist í því fyrir ríki að ganga úr sambandinu en að vera áfram innan þess. Þetta kemur fram í bréfi sem Jean Castex, forsætisráðherra Frakklands, sendi Ursulu von der Leyen, forseta framkvæmdstjórnar sambandsins, síðastliðinn fimmtudag. Fjallað var um málið á fréttavef brezka dagblaðsins Daily Telegraph í gær.
Tilefni bréfsins eru deilur stjórnvalda í Frakklandi og Bretlandi um veiðar franskra fiskiskipa í efnahagslögsögu síðarnefnda landsins. Með útgöngu Breta úr Evrópusambandinu endurheimtu þeir meðal annars stjórn sjávarútvegsmála á brezkum hafsvæðum sem var áður í höndum sambandsins. Hafa ásakanir gengið á víxl á milli Breta og Frakka um brot gegn fríverzlunarsamningi Bretlands og Evrópusambandsins.
Furðar sig á málflutningi ráðherrans
Frönsk stjórnvöld telja ráðamenn í Bretlandi hafa veitt færri frönskum fiskiskipum veiðileyfi en eigi rétt á þeim en þeir síðarnefndu segja öll skip sem uppfylla skilyrði þess að fá leyfi hafa fengið þau. Hafa ráðamenn í París hótað Bretum refsiaðgerðum verði brezkir ráðamenn ekki við kröfum þeirra. Til að mynda að hægja á tollskoðun varnings á leið til Brelands og hækka tolla á raforku til íbúa brezku eyjarinnar Jersey.
Haft er eftir háttsettum heimildarmanni í ríkisstjórn Bretlands að það sæti undrun að frönsk stjórnvöld skuli kalla eftir því opinberlega að Bretum verði refsað fyrir að hafa yfirgefið Evrópusambandið enda sé um að ræða sjónarmið sem ráðherrar í ríkjum þess hafi sjaldnast viðrað á opinberum vettvangi. Yfirleitt hafa pólitískir forystumenn innan sambandsins ekki talað um slíkt til þessa nema innan eigin raða.
Fram kemur í frétt brezka blaðsins að til þessa hafi einungis stjórnvöld á Írlandi lýst opinberlega yfir stuðningi við kröfur franskra ráðamanna á hendur Bretum í fiskveiðideilunni. Á hinn bóginn hafi stjórnvöld í Þýzkalandi sagt frönskum ráðamönnum að halda sig til hlés og eftirláta fulltrúum brezkra stjórnvalda og Evrópusambandsins að finna lausn á deilunni. Nokkuð sem hafi verið talsvert áfall fyrir franska ráðamenn.
Móttækilegt fyrir málflutningi Frakka
Hins vegar segir Daniel Hannan, sem sat á þingi Evrópusambandsins fyrir brezka Íhaldsflokkinn í rúma tvo áratugi, í grein á vefsíðu Daily Telegraph að miðað við reynzluna til þessa telji hann að sambandið muni þegar upp verði staðið taka upp hanzkann fyrir frönsk stjórnvöld í deilunni við Breta. Þannig hafi ráðamenn í Brussel til þessa ekki vílað fyrir sér að styðja rangan málstað ríkja sinna í deilum við önnur ríki.
Forsætisráðherra Frakklands sé ekki með bréfi sínu að óska eftir stuðningi Evrópusambandsins með þeim rökum að frönsk stjórnvöld hafi rétt fyrir sér í deilunni við Bretland heldur á þeim forsendum að sýna verði ríkjum sambandsins fram á að það sé verra að yfirgefa það en vera áfram innanborðs. Hannan segist telja að ráðamenn Evrópusambandsins muni reynast móttækilegir fyrir þeim málflutningi ráðherrans.
HJG
(Ljósmynd: Eiffel-turninn í París, höfuðborg Frakklands. Eigandi: Hjörtur J. Guðmundsson)
Tengt efni:
„Þetta er ekki vandamál tengt Brexit“
Fjármálahverfi London heldur stöðu sinni
Meiri útflutt fjármálaþjónusta þvert á spár
„Mikill sigur fyrir unnendur vína“
Hægt að draga verulega úr regluverki