„Þetta er mikill sigur fyrir unnendur vína og brezka vínframleiðendur. Ég er viss um að korktöppum verður skotið úr flöskum um allan heim til þess að fagna þessum ánægjulegu fréttum,“ segir Miles Beale, framkvæmdastjóri samtaka brezkra vínframleiðenda, í samtali við dagblaðið Daily Telegraph.
Fram kemur í fréttinni að unnendur vína í Bretlandi muni spara 130 milljónir punda á ári (tæpa 23 milljarða króna) vegna áforma brezkra stjórnvalda um að skera niður íþyngjandi regluverk frá Evrópusambandinu um innflutning á vínum sem mögulegt sé vegna útgöngu Breta úr sambandinu.
Þannig hafa brezk stjórnvöld í hyggju að fella niður þá kröfu að uppfylla þurfi regluverk í tengslum við innflutning á vínum sem kveður meðal annars á um mælingu á sýrustigi vínsins en sú krafa er ekki gerð vegna innflutnings á öðrum áfengum drykkjum eins og til að mynda á bjór og sterkum vínum.
Samhliða útgöngu Bretlands úr Evrópusambandinu sagði landið einnig skilið við samninginn um Evrópska efnahagssvæðið (EES) og samdi þess í stað um víðtækan fríverzlunarsamning við sambandið. Sama regluverk um víninnflutning er í gildi hér á landi vegna aðildar Íslands að EES-samningnum.
Til marks um ávinninginn af útgöngunni úr ESB
Mat brezkra stjórnvalda er að neytendur muni spara sér 130 milljónir punda árlega en brezkir vínframleiðendur telja töluna mun hærri. Þannig muni sparast 100 milljónir punda vegna innflutnings frá ríkjum utan Evrópusambandsins og 70 milljónir vegna innflutnings frá sambandinu.
Hins vegar munu brezkir vínframleiðendur þurfa að uppfylla kröfuna vegna útflutnings til Evrópusambandsins vegna regluverks þess. Fram kemur að þeir hafi lengi bent á að regluverkið snúist um tæknilegar viðskiptahindranir til þess að vernda vínframleiðendur innan sambandsins.
Haft er eftir Ranil Jayawardena, ráðherra alþjóðaviðskipta í brezku ríkisstjórninni, að fyrirhuguð breyting sé til marks um ávinninginn af útgöngunni úr Evrópusambandinu sem geri stjórnvöldum kleift að fella niður íþyngjandi regluverk sem feli í sér kostnað fyrir almenning og brezkt efnahagslíf í heild.
„Það er frábært að brezkur almenningur þurfi ekki lengur að greiða fyrir óþarfa skriffinsku þegar hann verzlar sér flösku af víni,“ segir ráðherrann einnig í fréttinni. „Með viðskiptasamningum okkar erum við að greiða fyrir aðgengi brezkra neytenda að gæðavörum hvaðanæva að úr heiminum.“
HJG
(Ljósmynd: Rauðvínflaska og glas með rauðvíni. Eigandi: Congerdesign – Wikimedia Commons)
Tengt efni:
Hægt að draga verulega úr regluverki
Mjótt á mununum eða ekki?
Vilja ekki ganga aftur í ESB