Forseti Frakklands, Emmanuel Macron, er reiðubúinn að deila sæti landsins í öryggisráði Sameinuðu þjóðanna með Evrópusambandinu gegn því að ríki þess styðji áform hans um að sambandið fái endanlega eigin hersveitir. Þetta hefur brezka dagblaðið Daily Telegraph eftir nánum bandamanni forsetans.
Fram kemur í fréttinni að frönsk stjórnvöld hafi lagt stóraukna áherzlu á samruna ríkja Evrópusambandsins á sviði varnarmála í kjölfar þess að ráðamenn í Ástralíu hættu við að kaupa dílselknúna kafbáta af Frökkum og sömdu þess í stað við Bandaríkjamenn um kaup á kjarnorkuknúnum kafbátum auk þess að semja við Bandaríkin og Bretland um varnarsamning. Hafa Frakkar sakað Ástrali um að stinga sig í bakið.
Vaxandi stuðningur hefur verið við það markmið að Evrópusambandið fái eigin her og hafa forystumenn Þýzkaland til að mynda einnig lýst yfir stuðningi við það. Samhliða því hafa verið tekin ýmis skref í þá átt og hefur sambandið þannig til dæmis eigið herráð. Með útgöngu Bretlands úr Evrópusambandinu í byrjun síðasta árs hvarf af sviðinu helzti andstæðingur þess innan sambandsins að það fengi eigin hersveitir.
Fái allt að 20 þúsund manna hraðsveitir
Frönsk stjórnvöld fara með forsætið innan ráðherraráðs Evrópusambandsins á fyrri hluta næsta árs og hafa þau þá í hyggju að leggja meðal annars áherzlu á aukinn samruna í varnarmálum. Tillaga hefur þegar verið lögð fram um að sambandið fái allt að 20 þúsund manna hraðsveitir sem beita megi hvar sem er í heiminum með skömmum fyrirvara en reiknað er með að hún verði tekin formlega fyrir í forsætistíð Frakka.
Rifjað er upp í fréttinni að bæði frönsk og þýzk stjórnvöld hafi kallað eftir því að einróma samþykki ríkja Evrópusambandsins í utanríkismálum innan ráðherraráðsins verði afnumið en málaflokkurinn er einn af fáum þar sem enn er krafizt samþykkis allra ríkja sambandsins. Þess í stað verði miðað við aukinn meirihluta, þar sem einkum er miðað við íbúafjölda ríkjanna, sem þýði aukin áhrif Þjóðverja og Frakka.
Frakkland er eina ríki Evrópusambandsins sem hefur fastafulltrúa í öryggisráði Sameinuðu þjóðanna eftir að Bretar yfirgáfu sambandið. Evrópusambandið sjálft hefur einungis áheyrnarfulltrúa eins og staðan er í dag. Auk Bretlands og Frakklands eiga Bandaríkin, Kína og Rússland fastafulltrúa í ráðinu.
HJG
(Ljósmynd: Emmanuel Macron, forseti Frakklands. Eigandi: Syced – Wikimedia Commons)
Tengt efni:
Vilja að ESB fái eigin hersveitir
Vilja Ísland í evrópskt sambandsríki
Sama gamla stefnan í grunninn
Flýti fyrir Bandaríkjum Evrópu
Frelsið til þess að ráða eigin málum