Meðal þess sem fram kemur í stjórnarsáttmála nýrrar ríkisstjórnar Þýzkalands, sem samanstendur af Jafnaðarmannaflokknum, Græningjum og Frjálslyndum demókrötum og tók við völdum í byrjun desember, er að áfram verði unnið að því markmiði að Evrópusambandið verði endanlega að sambandsríki.
Þannig segir í stjórnarsáttmálanum að þýzka ríkisstjórnin vilji nýta yfirstandandi ráðstefnu Evrópusambandsins um framtíð þess (e. Conference on the Future of Europe) til þess að gera umbætur á sambandinu. Stjórnin styðji það að gerðar verði breytingar á sáttmálum þess til þess að ná umræddu markmiði.
„Föderalen europäischen Bundesstaat“
„Ráðstefnan ætti að leiða til stjórnskipulegs ferlis og áframhaldandi þróunar í átt að evrópsku sambandsríki,“ segir í stjórnarsáttmálanum eða eins og það er orðað á þýzku: „föderalen europäischen Bundesstaat“. Þá er enn fremur rætt í sáttmálanum um að Evrópusambandið þurfi að verða leiðandi afl í heiminum.
Fjallað er meðal annars um málið á evrópska fréttavefnum Euractiv þar sem til að mynda er vitnað í Olaf Scholz, nýjan kanzlara Þýzkalands, þess efnis að fullvalda Evrópusamband sé lykilatriði í stjórnarsáttmála ríkisstjórnar hans. Þá eru rifjuð upp fleiri fyrri ummæli Scholz í þá veru að til verði eitt sambandsríki.
Forystumenn ítrekað kallað eftir sambandsríki
Forystumenn í þýzkum stjórnmálum, líkt og í ófáum öðrum ríkjum Evrópusambandsins, hafa í gegnum tíðina ítrekað kallað eftir því að sambandinu verði endanlega breytt í eitt ríki. Þar á meðal Gerhard Schröder, sem var síðasti kanzlari Þýzkalands úr röðum jafnaðarmanna áður en Scholz tók við embættinu.
Hið sama á til dæmis við um Joschka Fischer, sem gegndi embætti utanríkisráðherra og varakanzlara í ríkisstjórn Schröders fyrir Græningja, Ursulu von der Leyen, núverandi forseta framkvæmdastjórnar Evrópusambandsins og fyrrverandi varnarmálaráðherra, og Helmut Kohl, fyrrverandi kanzlara Þýzkalands.
Fyrsta sinn í þýzkum stjórnarsáttmála
Forveri Scholz, Angela Merkel, kaus hins vegar að ganga ekki mikið lengra en að tala um „politische Union“ sem þó er allajafna skilgreining á ríki sem samsett er úr minni ríkjum. Þetta er líklega í fyrsta sinn sem lýst er yfir stuðningi við það að Evrópusambandið verði að einu ríki í þýzkum stjórnarsáttmála.
Forsenda þess að Evrópusambandið verði endanlega að einu ríki er einróma samþykki ríkja þess. Hins vegar er ljóst að helzta fyrirstaðan í þeim efnum er úr sögunni með útgöngu Breta úr sambandinu. Þá eru ófá dæmi um að mjög umdeild mál hafi að lokum verið samþykkt þrátt fyrir mikla andstöðu á fyrri stigum.
HJG
(Ljósmynd: Olaf Scholz, kanzlari Þýzkalands. Eigandi: Christoph Braun)
Tengt efni:
Stærstu ríkin í algerri yfirburðastöðu
Fær ESB sæti Frakka í öryggisráðinu?
Vilja að ESB fái eigin hersveitir
Vilja Ísland í evrópskt sambandsríki