„Hversu innilega sem ég kann að vera andvígur Brexit þá geri ég mér grein fyrir því að þetta er búið og gert,“ sagði Tony Blair, fyrrverandi forsætisráðherra Bretlands og einn helzti andstæðingur útgöngu landsins úr Evrópusambandinu, á ráðstefnu á vegum Tony Blair Institute for Global Change á dögunum.
Fram kemur á fréttavef brezka dagblaðsins Daily Telegraph að Blair hafi sagt á ráðstefnunni að málið væri þannig í raun útrætt. „Við höfum afgreitt málið lagalega séð, við höfum afgreitt það pólitískt og þessu verður ekki snúið við í fyrirsjáanlegri framtíð. Við getum sagt ekki á meðan núverandi kynslóðir verða við líði.“
Hins vegar sagði Blair að eftir sem áður yrði að taka á málum sem tengdust útgöngunni úr Evrópusambandinu og væru óleyst. Þar á meðal deiluna um Norður-Írland en samið var um það að kröfu sambandsins að Norður-Írar fylgdu áfram reglum innri markaðar þess á meðan það á ekki við um afganginn af Bretlandi.
Forsætisráðherrann fyrrverandi var í fremstu víglínu þeirra sem börðust gegn útgöngu Bretlands úr Evrópusambandinu um árabil þar til útgangan varð loks að veruleika. Á síðasta ári lýsti hann því hins vegar yfir að þó hann væri enn andvígur útgöngunni yrðu Bretar nú að reyna að gera það bezta út henni.
HJG
(Ljósmynd: Tony Blair, fyrrverandi forsætisráðherra Bretlands. Eigandi: Utanríkisráðuneyti Bandaríkjanna)
Tengt efni:
Hindri að fleiri ríki gangi úr ESB
Hagstæðara að sigla undir brezkum fána
Fjármagn streymir til Bretlands
Höfuðstöðvar Shell til Bretlands
Vilja refsa Bretum fyrir Brexit